網民熱話：新《尋秦記》揀新歡定舊愛？
05月12日(二) 19:46


由飛虎Madam宣萱做「烏廷芳」，拍埋緋聞男友古仔，郎才女貌。

【on.cc東網專訊】 藝人陳偉霆（William）自從轉戰內地後愈撈愈掂，人氣爆燈嘅佢名利雙收，唔單只勁袋3000萬人仔，而且仲首次打入福布斯中國名人榜第70位，短短幾年間就有咁嘅成績，William認真叻仔！
最近有消息指內地將斥資過億製作內地版《尋秦記》，並打算搵William擔正做男主角「項少龍」！呢個消息一出，即引來網友熱烈討論到底咩女主角先可以配得上「內地小鮮肉」William？
其實當年無綫改編嘅《尋秦記》入面，由型男古天樂飾演嘅「項少龍」，最後係享齊人之福，尤記得當年無綫版《尋秦記》結局之時，男主角「項少龍」左擁歡喜冤家「烏廷芳」、右抱才貌雙存嘅「琴清」，好不快活！因此有網友大膽建議，呢個新版《尋秦記》就由William嘅新歡蔡卓妍（阿Sa）同舊愛楊穎（Angelababy）分別飾演「烏廷芳」以及「琴清」呢兩個角色，好讓William喺戲劇世界一享齊人之福！
喺《尋秦記》之中，身為烏家堡大小姐嘅「烏廷芳」擅長騎術，英姿煥發嘅佢仲周不時以男裝打扮亮相，最重要嘅係「烏廷芳」對「項少龍」用情極深，好似佢咁驕傲最後都容許「琴清」瓜分「項少龍」嘅愛，相信只有「情」一字，別冇其他原因！網友就覺得呢個角色非Sa莫屬，因為阿Sa早於2008年已經試過同型男吳尊合作電影《武俠梁祝》，喺裏面阿Sa女扮男裝嘅造型已經深入民心，佢一舉手一投足可謂英氣十足，再加上喺現實中佢同William嘅情侶關係，相信可以將「烏廷芳」對「項少龍」嘅深情發揮得淋漓盡致！
《尋秦記》另一位女主角「琴清」被形容為勇於追求愛情、矛盾、美麗、飽讀詩書、靈活變通嘅女子，網友認為如此美好夢幻嘅角色一定要由「顏值」高嘅女明星演繹，因此提議由Angelababy飾演就最好不過！Baby向來嘅古裝造型都唯美至極，再加上佢同William亦曾經拍過拖，相信佢哋之間演起愛情戲碼時，一定會別有一番火花！