關菁今日設靈
魏駿傑到場致祭


無綫甘草演員關菁（關達泉）上個月因為心臟病發離世，享年63歲。他的喪禮將會喺明日11時於紅磡福澤殯儀進行大殮，儀式過後，遺體將移往鑽石山火葬場火化。

今日設靈儀式上，不少曾經與關師傅合作過的演員都有送上花牌，好似宣萱、歐陽震華及吳廷燁等等，與他合作過的魏駿傑、吳廷燁、駱應鈞及李添勝等等，都有到場致祭。

聽講關師傅心臟一向麻麻，魏駿傑表示：「係o架，佢係喺手術途中離開，佢屋企人都知呢個手術係風險好高，當時都喺現場！」講到相處點滴，他說：「以前拍戲出外景，收工會去關師傅間房飲茶，阿嫂又會整定啲嘢食，我哋成日互窒對方，大家係好好朋友！」他又慨嘆表示：「人生無常，有幾多錢都冇用，最緊要係活得開心！我都有同阿嫂講，最緊要唔好亂諗嘢，好彩佢三個仔都出咗身，仲結埋婚添！」再問他失去了一位好朋友兼好演員，會否覺得可惜？他說：「我都睇清咗，後生嗰陣會呼天搶地，但係o依家唔同，有時喊都喊唔出，眼淚在心裏流！」