重量級外援舊將回巢拍劇 大家最期待邊位嘅演出呢？
娛樂LOL – 2016年11月8日星期二下午4:37



無綫近年嘅收視認真麻麻，大家睇下台慶劇《來自喵喵星的妳》就知啦！為咗救亡，無綫搵嚟咗一班重量級外援同舊將回巢拍劇賀50週年，而且大部份劇集都係一啲受歡迎劇集嘅續集。今日就搵咗其中一部份重量級外援同埋舊將嘅例子出嚟，各位又最期待邊一位嘅演出呢？

羅嘉良《與諜同謀》
當年無綫嘅一線小生羅嘉良回巢拍劇，梗係令人期待啦！一向做慣商戰劇嘅佢演技已經唔使多講，再加上「3屆視帝」嘅名銜，睇來一定叫好叫座。自從拍完2009年嘅TVB台慶劇《富貴門》後已經有六年未喺香港拍過劇集，佢今次被監製黃偉聲成功邀請佢返嚟拍呢套20集嘅新劇，今次佢飾演「商場大鱷」，角色亦正亦邪。而且佢今次會帶著女主角李佳芯、鄭俊弘同黃心穎一齊演出，有「撈家」加新一代女神喺度，收視想低都難。


鮑起靜《同盟》
由本年度神劇《城寨英雄》嘅監製文偉鴻（Jazz）打造嘅《同盟》被認為係現代版嘅《城寨英雄》。故事主要圍繞陳展鵬、胡定欣、陳山聰、姚子羚之間嘅競爭，不過最令人期待嘅當然就係鮑起靜（鮑姐）啦！而最緊要嘅係佢雖然已經67歲，仍然要喺劇集中跑嚟跑去打到飛起，一定睇到觀眾十分肉緊。


苗僑偉《使徒行者II》
雖然《使徒行者II》嘅宣傳重心都放咗喺周柏豪到，不過大家唔好唔記得三哥苗僑偉嘅魅力。雖然近排有人話苗僑偉嘅有型熟男位置被《巨輪II》嘅吳岱融取代，不過一向擁有大班師奶粉絲嘅佢，今次可唔可以憑住《使徒行者II》重奪「熟男神」寶座呢？大家拭目以待喇！
image

宣萱《不懂撒嬌的女人》、《使徒行者II》

今次無綫落重本，以二千八百萬拍攝嘅《不懂撒嬌的女人》，分別由兩位昔日嘅猛將林文龍同宣萱擔正。宣萱話今次因為無綫首度以4K技術拍攝，作為「開荒牛」嘅佢責任重大，所以積極做Facial，仲戒晚餐三星期，都係為咗套劇集。宣萱咁搏，大家冇理由唔畀面啦！


李司棋《溏心風暴3》
雖然《溏心風暴3》已經確定咗大部份角色都唔會繼續出演，就好似林峯、陳法拉、鍾嘉欣咁。不過各位「唔駛驚，荷媽喺大廳」！今次仍然有夏雨、李司棋、關菊英、米雪等老戲骨坐鎮。相信大家仍然會記得當年被李司棋嘅眼神一瞪，個心都會離一離。咁耐無見，唔知司棋姐會收減啲火，定係會薑越老越辣呢？
image

蔡少芬《老表，畢業喇！》
蔡少芬自從憑住《甄嬛傳》喺內地爆紅之後，佢就一直主攻內地市場，好耐都無返去TVB拍戲。不過原來佢仍然同TVB有一部戲約，佢今次就終於揀咗同王祖藍、郭晉安合作《老表，畢業喇！》。今次接棒萬綺雯做女主角，蔡少芬話雖然佢喺呢套劇集係新人，不過本身已經唔新，所以冇咩壓力。咁胸有成竹，相信一班觀眾一定好期待佢嘅演出！
image

馬浚偉《宮心計2 － 深宮計》
話說《宮心計》監製梅小青回巢TVB，當然要開番套續集《深宮計》。今次故事會以唐朝為背景，馬浚偉飾演皇帝，劉心悠出演平民公主，胡定欣就做皇后。作為其中一套50周年重頭劇嘅男主角，就知道馬浚偉喺大台心目中有幾重要。