是非纏身 呂晶晶感激蘇永康力撐
2016-10-08

無線外購劇《隱世者們》在馬來西亞播映以來，打破近兩年最高收視紀錄，劇集近日登陸myTV SUPER，劇中飾演特工的諸葛紫岐愛將呂晶晶感興奮，對近期捲入莊端兒是非的她，確是一個好消息！靚女晶晶大讚拍劇時獲前輩吳啟華、蘇永康和宣萱等照顧，更感激蘇永康力撐佢，她自爆：「捲入莊端兒是非後，蘇永康send短訊力撐我，仲提醒我有乜事都要冷靜處理，係一個好體貼嘅前輩！」

呂晶晶跟吳啟華、蘇永康和陶大宇都合作過電視劇，所以感覺唔陌生，個個都好關照她：「開工第1日跟宣萱對戲時，宣萱會用自己角度同我分析劇中人物角色。每當有『飛紙仔』場口，啟華就會幫我逐個字去糾正廣東話發音，甚至語氣，勁nice。至於蘇永康同cool爆外表完全相反，好平易近人好識得關心人，就算個劇拍完，我哋都會喺個群組度保持聯絡。」

　　提到本來同公司的莊端兒，單方面要求跟星韜解約風波，呂晶晶強調公司上下一心團結一致，更力撐諸葛紫岐（Marie）係一個好老闆：「一直以嚟不論工作環境、收入同埋工作都感到好滿意，咩係『超越底線工作」，就算有應該俾經理人隔走晒啦，所以莊端兒咁數Marie我好嬲，亦戥公司不值！佢鬧爆我抽佢同張致恒水，反而無咁激氣。最感覺混亂係我6月30日生日時，莊端兒都有嚟慶生，仲好熱情咁送我卡片包禮物。所以佢話：『我唔知我幾時成為你好姊妹！』真係好莫名奇妙囉。」

採訪：方騫平 攝影：李權威

髮型：David Ko@HH Salon 場地：Le Grand Pokka Café

服裝：@charlieshing @bothofus_official