釘姐爆seed冇影 《使徒行者2》多咗陳豪柏豪袁偉豪
東方新地自 orientalsunday.hkk | 東方新地



日前TVB宣布同內地娛樂公司合作，除咗翻拍經典劇《創世紀》，亦會開拍《使徒行者2》。不過林峯同佘詩曼相繼離巢，日前阿佘講明寧願拍電影版續集都唔會接劇，即係肯定釘姐同爆seed都唔會出現晌《使徒2》！冇咗男女主角，得番「卓Sir」苗僑偉同「歡喜哥」許紹雄留低，吸引力實會大減。不過TVB新加入黃翠如同宣萱，仲有陳豪、袁偉豪、周柏豪，希望呢個「三豪子」組合幫到手啦！






《使徒行者》電影版冇咗「爆seed」林峯，但阿佘肯繼續做釘姐，加埋張家輝、吳鎮宇同古天樂三大男星，票房依然大收近6億！電影版行得通，電視版又點呢？日前TVB落實開拍續集，不過今次連阿佘都冇埋，得番三哥同Benz雄，而且好受歡迎嘅Kobe又晌上集死咗，原班人馬散得七七八八！

不過TVB勝在板凳深度夠，即係話，冇咗林峯阿佘，仲有其他人補上。日前陣容已經落實，視帝陳豪將會做男主角，宣萱亦會頂替阿佘做女一；另外翠如BB、周柏豪同牙佬袁偉豪都有份，三大男神加入，又有女神翠如BB，計牌面應該唔差太遠嘅！