2016年08月04日


探熱針
中伏！宣萱被呃　執鄧萃雯二攤


宣萱同鄧萃雯都係視后級人馬，但論好戲鄧萃雯點都高幾班。

新人難成氣候大台捧唔起，惟有扮矮仔，重金搵番舊將林文龍同宣萱回巢，拍首部以 4K攝製的重頭劇《不懂撒嬌的女人》。
當日不歡而散的宣萱，曾經狂踩舊公司冇新意，今次肯食回頭草，全因大台俾足一籮誠意，一開始就由助理總經理杜之克親自出面傾約，又講到個劇本是專登為她度身訂造，結果落叠。
但宣萱其實係執二攤！今年初，杜之克已經攞住同一個劇本搵鄧萃雯，不過如妃娘娘嫌對方出手低，拒絕大台「好意」。


怕衰唔敢用港姐

大台打鑼打鼓話要用 4K拍攝新劇《不懂撒嬌的女人》，由於是第一部 4K製作，更加是助理總經理杜之克首部一手策劃的劇集，唔衰得！所以唔敢貿貿然起用陳凱琳、蔡思貝之類欠觀眾緣的愛將，杜之克決定搵舊人回巢，增加叫座力。
第一人選，是一二年拍完《金枝慾孽貳》的如妃鄧萃雯，雯女已經有幾年冇拍香港劇，觀眾餓了一段時間，加上戲好有保障，杜之克為表誠意，特別搵人寫了個近乎完整的劇本，攞住去同對方傾。


宣萱同林文龍入行廿年，首度正式合作，但開工冇幾耐，兩人已十分投契。




日前他們在將軍澳拍外景，宣萱未有戲份，但都去睇林文龍做戲，對這部戲好投入認真。


嫌出手太低

「雯女都好俾面，有出去同杜之克見面，佢哋講到個劇本係特別為佢度身訂造；雯女睇過個古仔，都幾鍾意，覺得寫得幾好，比起之前拍開嘅 TVB劇，今次係有啲新意，但一傾到酬勞問題，佢哋就冇乜誠意囉！
「而家雯女拍大陸劇一集收近廿萬港幣，做一個綜藝節目都收五、六十萬一集，所以佢搵唔到有乜理由，收咁嘅錢返 TVB捱。」鄧萃雯身邊人說。


大台首部 4K電視劇，除了宣萱、林文龍外，仲有唐詩詠、高海寧及王浩信等人。

杜之克用同一條橋，點知得宣萱落疊。
內地欠路數

遭鄧萃雯極速拒絕後，杜之克於是轉移目標到宣萱身上，同一劇本同一招數，又係特別為對方度身訂造。
由於宣萱在內地脈絡不足，脫離大台後，只是偶然拍吓港台劇集和一些細規模的新加坡製作，見大台表現得如此有誠意，好快就應承回巢。對於執鄧萃雯二攤一事，一直被蒙在鼓裡。

「港姐幫」陳凱琳同蔡思貝劇接劇，但去到重頭劇，大台都唔敢俾佢哋孭飛。

撰文、攝影、攝錄：娛樂組