孖密友睇鞋 吹神宣萱好Talk得
2016年5月31日

　　前無綫花旦宣萱（Jessica），早前拍完金牌監製鄧特希的新劇《隱世者們》，同舊拍檔陶大宇、吳啟華和蘇永康等老友合作又乘機聚舊。影視復工的Jessica，日前傍晚現身銅鑼灣利園鞋店，在場仲有前花旦的閨密、歐陽震華太太傅潔嫻，以及方中信老婆莫可欣。逗留逾兩個鐘，宣萱同兩位人妻喪吹唔停，又與店員鬼咁好傾，唔做藝人，可以考慮轉行做星級公關吖！

　　45歲的宣萱好耐無拍劇，早前拍完鄧特希新劇，據悉舊娘家TVB有意搵佢回巢，不過好戲之人宣萱未有即時心動，話有好劇本才考慮拍。?家自由身的她，要自己傾job，不時返內地登台接商演，不愁無工開。近日，TVB在深宵時段，繼重播宣萱和古天樂孭飛、01年首播的《尋秦記》，又翻loop 99年的《寵物情緣》，睇番17年前短髮宣萱，爽朗得嚟又pure，最緊要係同?家個樣分別唔大，凍齡有辦法。

　　日前傍晚，名鞋店的利園分店有活動，見宣萱先和歐陽震華太太傅潔嫻「八婆仔」上身，行埋一邊狂咬耳仔，超級神秘。兩女友愈傾愈興起，連宣萱行開睇鞋飲香檳，兩女都仲「遙距」肉緊傾偈，幾咁長氣。密斟成個鐘，人妻先行離開。Jessica再搵莫可欣和其他店員楔時間，三個女人一個墟，莫可欣講到手口並用，同宣萱一樣吹神上身。

　　採訪 ︰ 梁志明


※長髮宣萱同歐陽震華太太傅潔嫻（右）咬耳仔。




※孖人妻莫可欣取車時，宣萱仲手指指吹水。


※早前，宣萱孖舊拍檔吳啟華拍《隱世者們》。


※重播99年的《寵物情緣》，當時28歲的宣萱短髮造型好fresh。


※早排，宣萱憑電影《我來自紐約》在《第七屆澳門國際電影節》奪最佳女配角。


※轉頭又黐實莫可欣（右），三個女人一個墟。


※行開咗，都要繼續傾。