Viu TV打到嚟 無綫搵邊位昔日花旦回巢好？

娛樂LOL
2016年5月6日


無綫依家可以話係裡外受敵，外面就有ViuTV強勢追住佢嚟打，而佢哋內部就不斷有花旦小生離巢潮，搞到而家經常要起用一班演技幼嫩嘅新人，就好似陳凱琳、蔡思貝等，拍到邊就俾人鬧到邊。相信好多觀眾都好希望可以見返一班有戲之人演出，如果有得揀各位又最想見返邊個呢？

蔡少芬
曾經係無綫「四大花旦」之一嘅蔡少芬拍親嘅劇集套套都係重頭戲，極得無綫重用，而家無綫午間劇場仲播緊佢同黃子華主演嘅《棟篤神探》。後來去咗大陸發展參與《後宮甄嬛傳》拍攝，跟手紅埋。事業如日中天之外，佢感情方面亦十分順利，自從嫁咗俾張晉之後就過住幸福少奶奶嘅生活，到而家都仲會係網上晒恩愛，真係羨煞旁人。


張可頤
亦曾經係「TVB千禧年代五大花旦」嘅張可頤係公認嘅好戲之人，到而家47歲都仲fit爆，出返嚟積極拍劇都唔係話冇可能。尤其是前排仲有新聞話佢投資失利共虧蝕達7位數字，應該都好等錢使。不過佢就話已經唔想再拍劇，想嘗試做監製或者編劇。不過佢之前離開無綫去咗幫香港電視拍《來生不做香港人》，睇個勢佢都應該唔會返到去架啦！


宣萱
被譽為「90年代至21世紀無綫五大當家花旦之一」嘅宣萱相信大家都唔會陌生。唔知大家啱啱睇完《尋秦記》重播有冇少少掛住佢呢？早前，無綫助理總經理杜之克公開表示將會邀請舊將回巢，當中仲特別點名宣萱。有傳媒詢問佢無綫係咪已經聯絡佢商談合約，宣萱就大賣關子：「等confirm咗再講。」睇嚟可能好快見到佢喎？！


鄧萃雯
連續兩年獲得視后嘅鄧萃雯自從拍《金枝欲孽貳》同無綫不歡而散之後，佢就去咗內地發展。近年喺內地人氣急升嘅佢近排係微博好感性咁表示佢好感謝亞視畀機會佢，帶俾佢好多第一次，成為佢繼續向前嘅動力。但係就冇提過無綫，睇嚟仲未嬲完喎，返去機會好渺茫。


陳妙瑛
已經淡出娛樂圈多年嘅陳妙瑛近年轉戰美容界、搞飲食業，聽講身價已經過億。咁點解要返無綫呢？咪就係無理由囉！


關詠荷
當年喺無綫穩坐一姐位置嘅佢曾經拍過《陀槍師姐》、《烈火雄心》、《金裝四大才子》等等嘅經典劇集，你冇可能會冇睇過。但係佢就竟然同咗當時籍籍無名嘅張家輝一齊，捱咗咁多年，一直係背後默默支持老公嘅佢終於守得雲開見月明，終於等到老公做影帝。而依家嘅佢寧願專心相夫教子，陪住女兒成長，慢慢淡出幕前。