http://hk.apple.nextmedia.com/realtime/magazine/20160223/54785803

【壹週刊】好賢淑！ 宣萱中環補衫 被圍笑笑口



藝人喺街見鏡頭，一係黑面，一係封口，一係兩樣都做齊，好似宣萱咁，做埋手勢叫你一齊行嘅藝人，實屬罕有。

有日行咇撞到宣萱，即刻吹兩句先，今個新年，有咩搞作呢？「靜靜哋過，周圍都好多人。」藝人去親中環，多數都係shopping同high tea，宣萱唔似好呢味喎！佢就話：「嚟搞啲日常生活嘢，買吓嘢咁啦。」

《壹》仔膽粗粗咁問宣萱，跟埋佢去買嘢得唔得，佢先係有啲愕然，但最後都冇say no，仲手指指咁帶路。中環人多車多，《壹》仔一度同宣萱失散，好彩佢有等埋咋，唔好意思囉。捐窿捐隙，原來佢喺去條巷仔到補衫，先唔講呢啲舊鋪頭仔買少見少，件衫穿窿，揀拎去補而唔係扔咗佢嘅女仔，更係十個都撞唔到一個，你話吖，你有幾耐冇拎衫褲鞋襪去補吖？

冇幾耐，巷仔愈來愈多人，唔少人見《壹》仔舉機，佢哋又拎起部手機影咗先算，宣萱開頭都冇為意，一見咁多人，即刻打咗個凸，唔使咁出奇喎，人靚心地又好嘅藝人，係受歡迎啲㗎喇！


《壹週刊》專屬App《壹週Plus》經已面世，請即下載，壹手掌握全城大事、娛樂秘聞、至爆猛料，走在潮流尖端！