【FACE即時】 14年3度重播《尋秦記》 古仔羨妮keep到 林峯變晒樣

http://hk.apple.nextmedia.com/realtime/magazine/20151212/54528399

(影片更新)大台近日年啲膠劇一套比一套膠，搞到凌晨12點15分呢個重播舊劇，亦係巴絲們最期待嘅黃金時段，播嚟播去都係n年前嘅作品，但起碼唔洗睇啲膠劇先。咁大台播完《男親女愛》，會播咩？咪就係《尋秦記》囉，呢套劇巴絲們梗係like爆啦，不過咁，數數手指，唔計01年首播，喺14年入面，今次已經係第三次重播喇，不過上次係中午重播嘅。

呢套劇當年播出後熱爆中港台三地，所以每次重播都會掀起追劇潮，而當年女一郭羨妮今年已41歲。日前佢將重遊兵馬俑嘅相在微博置頂，仲話︰「索顏『琴青』(於劇中角色)在尋秦中。」不過呢套劇已經係14年前作品，古天樂、林峯、郭羨妮、宣萱等劇中演員都已經離開大台，而且隔咗咁多年，唔少演員個樣都唔同晒，林峯愈嚟愈「靚仔」，郭羨妮做埋人妻同媽媽，仲有宣萱同今日（12.12)生日，長居新加坡嘅是中印混血美女雪兒等都另有發展，而江華更轉埋行做保險，今年再度蒲頭。

其實呢套劇咁正，唔少人當然希望可以拍成電影版啦，而早前已有傳古仔已經有呢個諗法，幾年前已開始籌備和洽購小說版權，但當時資金出問題，對劇本又唔滿意，所以就一度擱置。不過上年古仔成立公司後，重新啟動呢個計劃，亦透露自己會做番「項少龍」一角，當然林峷亦獲邀接拍，早前仲拍得古仔同林峯食飯添。雖然有指電影版會喺下年年中喺內蒙開拍，影片製作成本更高達1億1千萬，不過現在好似未有聲氣咁。

至於內地亦食住《尋秦記》呢條水開拍網絡版搵錢，仲搵埋「強國人都知道陳偉霆是誰」演項少龍一角，黃錦燊與趙雅芝的兒子黃愷傑做嬴政。不過內地禁止劇集有穿越內容，所以不能在電視台播映，喺網上先可以睇到。其實近年都有唔少經典電視劇翻拍電影版，不過希望今次《尋秦記》電影版如果拍得成，唔好好似《十月初五的月光》咁，雷聲大.....


其實45歲嘅宣萱咁多年都冇乜點變。(網上圖片 .