有話兒：夏文汐宣萱子珊
女神起義


■（左起）宣萱、夏文汐和徐子珊三代女神聚頭，吱吱喳喳談得非常暢快。攝影：陳俊強


娛樂圈孕育着一個又一個神話，男神女神此起彼落，由夏文汐（Patricia）、宣萱到徐子珊，三個感覺截然不同的女神未開金口就已成墟。因為名為女神的演唱會而湊在一起，不同年代出道但唯一相同的，都是十分抗拒「女神」一詞。
撰文：譚倩宜

在不少人眼中，夏文汐早已跟性感女神劃上等號，但她卻指自己稱不上為性感女神，反指後起之秀子珊才合資格，她日前接受本報專訪說：「我係夜貓女神，真係有人咁講過，因為我越夜越精神。子珊先係性感女神，佢跳舞好性感，骨子裏亦有種性感味道。」而90年代代表宣萱就笑說：「喺我心目中嘅女神係周慧敏嗰類型，講嘢好斯文、氣若游絲咁，笑嗰陣都要遮住個嘴，但我完全唔係咁，開心笑嗰時一定係擘大個口，所以我一定唔會係女神。」


女神不一定斯文高貴，爽直可愛的夏文汐指自己性格洋化，豪爽愛自由，訪問當天她身穿連身短裙，為免於錄影時不慎洩春光，故大家提議她以咕𠱸遮掩下身，豈料Pat即拉高裙襬說：「唔怕，我着咗打底褲，好安全，唔信你睇吓！」令在旁的徐子珊與宣萱笑得人仰馬翻。於記者會上首次跟夏文汐碰面，宣萱笑說：「我初頭以為Pat係個好正經嘅人，仲諗同佢傾偈要斯文啲，講嘢唔好太大聲，免得嚇親佢，但點知同佢傾落先知佢好玩得好好笑。」

被Pat指是新一代性感女神，徐子珊笑言愧不敢當，還指與女神二字扯不上關係，她說：「如果一定要係女神嘅，我就係低能女神，聽到Pat話我係性感女神，我真係唔敢當，下巴跌咗落地下，特別係佢喺我身邊，對我嚟講佢先係性感女神，我係『女神』嘅BB班，因為我身材又唔係好，又唔係斯文，拍埋佢哋度簡直唔入流。」


提到「我的女神演唱會」由來，夏文汐笑言一切都是因她而生：「伍健雄（演唱會負責人）同我講，話想搞個女神演唱會，我聽到即刻話好話撐佢，當時我只係講吓，點知一個星期都唔夠，佢就打畀我話搞掂晒，仲話預埋我唱。」由於演唱會中演出的大多不是專業歌手，對此宣萱說：「大家都係以一個party形式去舉行呢個演唱會，如果觀眾真係想欣賞音樂，都會去買專業歌手嘅演唱會飛啦，所以入得嚟睇嘅觀眾，都係抱住輕鬆心情入場。」

曾於訪問內坦言對唱歌零信心的子珊，問到她為何答允演出此演唱會？她說：「我𠵱家都係好驚㗎，不過因為義氣囉，我同伍健雄之前合作過，所以一定要撐佢。」既然沒信心，何以會由演員參一腳加入樂壇？子珊笑說：「咁係因為合約精神，簽咗當然要做好佢，當時又係自己搏殺時期。」