拍劇又舉行演唱會 宣萱 「開Turbo」前偷閒買燈

近年甚少現身幕前的宣萱，養尊處優，閒時學吓廚、整香水，又相約友人行街歎下午茶，直至近日才與舊拍檔王喜再次合作拍攝港台劇《火速救兵Ⅲ》，之後又即將開拍鄧特希的新劇，加埋同跨年代「女神」開演唱會，將有排忙。日前下午，忙練歌綵排的她就去中環鳩嗚減壓，見她在家具店揀燈飾，嚴選半個鐘，終於購下一盞枱燈，離開時發現記者都有主動打招呼。

　　為備戰11月舉行的《我的女神演唱會》，45歲宣萱近日積極跟張崇德練歌，她說：「雖然係唱番之前電視劇《難兄難弟》嘅歌，但錄碟又唔同唱現場，上台壓力大好多，所以要搵人陪我合唱。」

　　日前下午，淡妝宣萱現身中環歌賦街一間家具店揀燈飾，見她一個人細心挑選，不時拎起各款小燈睇，揀了約半小時，就看中一盞枱燈，付款時和店員有傾有講，更即場叫店員安裝試燈，保證無壞先安心離開。記者上前問她近況，她有禮表示已拍完港台劇《火速救兵Ⅲ》，現在已開始練歌和綵排，不過，始終演戲先係最愛，正期待開拍鄧特希的新劇，與《壹號皇庭》的班底陶大宇、蘇永康等合作，說罷就開車離開。

　　本報記者