網民熱話：盤點高學歷明星美貌與智慧並重
06月20日(六) 18:11



圈中有不少一班女星不但樣靚身材正，而且仲有好高學歷，以下逐一盤點喇！



【on.cc東網專訊】 唔少人都對娛樂圈有個誤解，就係認為讀唔成書嘅人，先會入娛樂圈，尤其係樣靚身材正嘅女明星，仲經常被嘲「胸大冇腦」，係「花瓶」！今屆香港小姐競選，「10A」狀元麥明詩（Louisa）憑住超班學歷，成功突圍而出，無驚無險殺入第二輪面試，成為咗網民熱烈討論嘅對象！網民們仲即時「回帶」，盤點咗一啲同樣「美貌與智慧並重」嘅中、港、台圈中人！
歌手莫文蔚當年就以3A（英語、法語及家政）5B嘅會考成績畢業於傳統名校拔萃女書院，品學兼優嘅佢仲曾獲頒第一屆「香港傑出學生獎」。其後，佢去咗意大利就讀高中，再喺英國倫敦大學主修意大利語同意大利文學，操流利五種語言（英語、粵語、國語、法語和意大利語）嘅莫文蔚，可以話係「冇得輸」！而成日喺電視劇入面飾演專業人士嘅陳慧珊同宣萱，現實中同樣擁有高學歷，陳慧珊喺美國波士頓學院修讀新聞學，而宣萱則喺僅次於劍橋及牛津大學嘅倫敦大學帝國理工學院修讀材料工程學學士，難怪兩位扮專業人士時，毫無違和感啦！
台灣方面，名模林志玲雖然15歲就畀星探發掘，但佢並冇放棄學業，遠赴加拿大多倫多嘅學校完成高中，再進入多倫多大學完成西方美術史和經濟學雙主修學位。而且估唔到志玲姐姐仲曾經喺台灣華岡藝校兼任導師，教授表演訓練課程，網民紛紛表示對住咁靚嘅老師，真係好難專心上堂啊！同樣喺台灣出生嘅性感女神林熙蕾，亦取得美國爾灣加州大學的經濟和文學雙學位，完全推翻「胸大冇腦」嘅歪論！
大陸嘅代表就要數影星趙薇，1996年時，趙薇已經以專業課全國第一文化課全系第一嘅成績考入北京電影學院表演系本科班。雖然紅遍亞洲，但佢2012年時仍然繼續進修，開始拍攝導演處女作《致我們終將逝去的青春》，呢套亦係佢導演系研究生嘅畢業作品。最後，趙薇以導演系論文答辯最高分從北京電影學院導演系碩士畢業，名副其實係一名「學霸」！


仲有宣萱，畢業於倫敦大學帝國理工學院修讀材料工程學學士。