同你吟一吟
飛虎拍續集　宣萱吹雞大無 綫

令電視畫面充滿胸肌同腹肌 嘅《飛虎》，星期日（八月十二日）播大結局，攞到三十點成績，簡直係週日收視奇跡。

多得上個禮拜四（九日）《飛虎》仝人出海剝衫谷劇，「展 sir」馬德鐘堅持唔除衫，但有大隻仔袁偉豪、翟威廉等肌男撐場，就連周身脂肪 嘅甘草曾守明都短褲上陣，啖啖肉。

當日因為男女主角宣萱馬德鐘唔肯留低續經理人約，套劇變 咗倉底貨，擺 响星期六、日夜晚是是但但播完就算，點知反應出奇好，無 綫計錯數， 嗱 嗱臨話籌備開《飛虎 2》，叫兩位男女主角簽部頭，馬德鐘已經動 咗筆，宣萱仲係十五十六。

出海當日，宣萱事先講定，如果留低會碌爆張人情卡：「我一定會叫古天樂、歐陽震華、羅嘉良、張家輝幫手客串。」以上四大小生，除 咗歐陽 Bobby，無 綫應該冇本事叫得郁佢 哋 嚟拍劇，既然宣萱拍心口， buy one get three free，多多錢續約費都抵俾啦！


成班肌佬一字排開谷《飛虎》，唯獨馬德鐘唔肯剝，都係甘草演員曾守明（右一）最抵得諗，出賣脂肪都肯。


宣萱因為「唔方便」拒絕落水，但都肯同馬德鐘玩水上電單車。


玩完水，全體演員換過件衫影合照，點知個個對準宣萱射水，搞到 iPhone中晒招，宣萱依然好玩得：「好咯，壞 咗我要換 iPhone5！」