媽咪姐手帳
黃日華見好唔收

去年 11月，黃日華喺微博喪鬧 TVB「 totally very bad」冷待台慶劇《刑警》，高層何麗全同樂易玲輪住開口耍冧，方平息華哥怒火。

上周五（ 14日）晚， TVB副行政主席梁乃鵬更親自出馬，科水近萬元，邀請一班台前幕後到中環永隆銀行大廈嘅宴會廳慶功。話晒升呢去到中環食飯，華哥語氣即刻溫文好多，不過依然語帶雙關寸嘴話：「呢餐唔係例牌菜咩？我原本都以為喺 TVB canteen慶功呀！之後先知喺呢度。但你估唔使俾過海費、泊車費咩？都成嚿水 o架！我都要俾錢 o架！」或者 TVB下次要諗得周詳啲，搵埋架 TVBubby私家車接華哥，先可以令佢收口囉！不過，華哥亦要見好就收，唔係玩過籠就弊嘞。


梁乃鵬同苗僑偉、宣萱傾緊偈，黃日華主動行埋去。


條氣順番晒啦！（設計對白）
可唔可以 claim番車錢？（設計對白）
之後黃日華雙手捉實梁乃鵬隻手俾記者影相。


原來梁乃鵬係俾咗兩個選擇監製揀，一係喺 TVB canteen擺 5圍，邀請《刑警》全體台前幕後出席。一係喺中環擺 1圍（ 24人），只請主要演員、監製、編審同導演。結果監製要面子唔要有福同享。


華哥雖然全晚笑晒口，但仍不忘向記者寸 TVB。