媽咪姐手帳
黃日華標尾會自娛
2010年12月17日

早前黃日華喺微博炮轟 TVB忽視《刑警》，事件愈鬧愈大， TVB即刻拿拿臨補鑊搞宣傳活動，兼喺《荃加福祿壽之宇宙最長演唱會》中，送番個視帝獎座俾佢，得華哥眉飛色舞。
可惜 TVB做嘢做一半，《刑警》大結局一啲宣傳活動都冇，上周四（ 10日），一班演員惟有自費喺佐敦某火鍋店烚住慶功。席間華哥仲晦氣咁話：「公司唔搞，我哋咪自己搞囉！」講真，華哥又唔使咁介懷嘅，好嘢自必然有人欣賞。好似三哥（苗僑偉）日前就喺微博報喜，指《刑警》由首集到結局，於所有中國網站都排第一位，在优酷的點擊率更超過 1000多萬人次，打破《尋秦記》的最高點擊紀錄。而周五（ 11日）大結局當晚嘅平均收視有 31點，華哥入獄嗰場仲高達 36點，證明觀眾係識貨嘅。
同樣係台慶劇，但 TVB冇為《刑警》谷大結局收視，好在一班演員自強，自費搞慶功。 TVB又真係大細超得好緊要。


三哥日前喺微博多謝工作人員合作完成《刑警》。


唔少網民留言撐《刑警》。