電視有正嘢
黃日華回歸　山寨刑警大報復
2010年10月29日

昔日五虎之一嘅黃日華，十幾年冇喺無綫演出，今年終於回歸，喺頭炮《刑警》中，飾演一個牽涉一單謀殺案而坐咗 15年冤獄才得到平反嘅警察。佢出獄後重返警隊，但為咗釋放十幾年嚟嘅怨氣，一方面追查當年真相，另方面凡遇到法律未能制裁嘅兇徒，便濫用私刑，將自己變成「地下判官」。
劇情熟口熟面？冇錯，因為無綫嘅抄襲門依然大開，繼續抄得就抄。呢套《刑》擺明又係照 dup 08年喺明珠台播過嘅《刑警》（ Life），今次更連劇名都費事改，係唔係過分咗啲呢？

美國 NBC嘅《刑警》， Daminian Lewis飾演嘅警探 Charlie，因一宗冤案而入獄 12年，後得律師兼紅顏知己 Constance嘅幫助而得以洗脫罪名。佢重返警隊後，為要冤案真相水落石出及摷出幕後元兇，其辦案作風已經脫離正軌。
而 TVB呢套《刑警》，入面嘅黃日華同樣係一個正直嘅刑警石東昇，卻被陷害坐咗 15年冤獄先得以平反，於是將內心所有嘅冤屈同憤怒投向現實世界，自言要替天行道，私自進行地下審判，變成警隊裏面最危險人物。老友兼好拍檔米安定（苗僑偉）發覺其行為有異之後，兩人關係變得亦敵亦友。東昇為阻撓安定追查自己，竟向安定女友許文謙（宣萱）下手，但安定仍堅持執法原則，誓要搵出東昇濫用私刑證據，兩人嘅鬥爭由暗變明。
睇過 TVB版《刑警》嘅片段，雖然又係山寨貨，但亦拍出戲味，唔似得《讀心神探》無論演員同劇情都淡過白開水。黃日華雖然自嘲係「老牌新人」，但依然有火，再加上苗僑偉，昔日兩虎劇內劇外都鬥出火花。

播映日期︰ 11月 1日起周一至周五晚 9:30pm 翡翠及高清翡翠台


黃日華飾演嘅石東昇，之前雖然脾氣火爆但辦案時卻係循規蹈矩。經過 15年冤獄之後，表面變得平和，實則內心充滿仇恨。


石東昇含冤入獄 15年，出獄後性格變得極端，常故意挑戰法律，拍檔米安定則堅持執法原則。兩人最後更展開生死決鬥。


陳秀珠（左）飾演嘅簡竹君，對丈夫石東昇有情有義，喺東昇入獄期間，負起照顧東昇父母責任。直至遇到李國麟飾演嘅賀佳喆（右）至再次戀愛，卻遭走火入魔嘅東昇出手破壞與佳喆嘅感情。


受到冤獄影響，石東昇對法律真理已經失去信任，經常執行自己一套對付疑犯。


苗僑偉飾演嘅米安定，懷疑東昇向疑犯執行私刑，但因當年曾間接令東昇含冤入獄而內疚，故多次以上司身分維護東昇。


宣萱飾演嘅雜誌總編許文謙，經常利用探員細妹許文詩（胡定欣飾），得以向資深警務人員打探得石東昇同米安定嘅關係。


喺《 Life》飾演刑警嘅 Damiam Lewis（左），曾憑《雷霆傘兵》而提名金球獎最佳男主角。

撰文︰姜培綺