明星喪玩
鬼馬「波凸」考起群星　胡杏兒宣萱爭住估

近月中日關係持續緊張，日元依然高企，不過港人對日本潮物嘅熱愛程度無減。今次我哋專誠搵咗兩件日本古怪波凸（ product），俾一眾藝員紅星估吓有咩用途。本刊發現班藝人除咗想像力非常豐富外，仲極度貪玩。胡杏兒同宣萱唔理上晒清朝妝，都要爭住估，真係難得一見。

胡杏兒宣萱當眾搶槍

記者搵杏兒估吓手槍用途時，佢好快就話用嚟吸暗瘡。而同劇好姊妹宣萱一見到杏兒手持「吸黑頭槍」對住自己個頭，立即從老遠走過嚟趁熱鬧。宣萱話：「你玩自殺呀？」之後兩人仲爭住玩「吸黑頭槍」，記者開估之後，宣萱猛問：「係咪真係吸到 o架？等我試吓先。」


係咪吸暗瘡？搵人試吓先！
究竟咩嚟 o架？


我「偕」咗落塊面度喎！哈哈！
原來係啜黑頭 o架！


宣萱想測愛犬口臭度

之後輪到宣萱估「測口臭機」時，佢先對住部機狂「喂」一輪，見到冇反應就決定放棄。當記者開估呢個係測口臭機時，出名係狗癡嘅宣萱第一時間問：「可唔可以俾我隻狗試吓？」咁都諗到，好嘢！


可唔可以俾狗用呀？


阮兆祥懶醒全錯

阮兆祥一見到測口臭機上面嘅入氣孔，就胸有成竹估呢個係用嚟「吹波波」（酒精測試機）。之後佢再見到吸黑頭槍時，即時將槍頭塞入鼻孔答：「我知呢支『蠱惑的槍』係用來吸嘢，會唔會係俾 BB吸耳屎同鼻屎呀？」估錯晒！


馬國明方向正確

身為男士美容公司代言人的馬國明，見到同美容有關嘅「吸黑頭槍」時仍然一頭霧水，佢話：「睇呢個似手槍嘅嘢係咪『毛孔收細器』呀？另外呢支粉紅棒要入電，應該係用來測試某啲嘢，係咪『面油測試機』？」雖然方向正確，不過全部都估錯！


沈卓盈面容扭曲

估唔到平時斯斯文文嘅沈卓盈，玩起上嚟創意十足，見到支塑膠製嘅「吸黑頭槍」，佢竟然估係紅外線機，專門幫助面部血液循環。而當記者攞出「測口臭機」時，沈卓盈即時面容扭曲，以為係「心邪」嘅小玩意，仲大叫：「係咪驗孕棒？定係 BB探熱機先？」經記者解釋玩法後先放心試玩，最後成功估中兩件小玩具。


陳美詩提議一機兩用

最初陳美詩以為「測口臭機」係錄音筆，不斷對住測口臭機係咁「喂」，「喂」咗成分鐘都冇反應。等到記者提水先識向入氣口吹氣，測到口氣度數時又刻意唔俾記者知。最後陳美詩都估中係咩，仲提議話：「如果呢部機咁勁，不如攞去電視城外圍，測試吓將軍澳堆填區有幾臭都好喎！」


「波凸 1」吸黑頭槍

吸黑頭槍係以抽真空原理，將皮膚內的黑頭吸出。用法是先將槍嘴對準黑頭位置，之後將槍的扳機拉後，即能製造出類似拔罐嘅抽真空效果，吸出黑頭。記者親身試驗，發現吸黑頭機吸啜力足以令皮膚紅腫，但吸啜力度並不強，需要於相同位置吸多幾下先得。
售價：$198


「波凸 2」測口臭機

測口臭機用法非常簡單，先將開關按下，之後畫面會見到 5秒倒數計時，倒數後向機頂吹氣，完成後畫面會顯示口臭情況。口臭共分 6個程度，由最輕微的 0度至最差的 5度。記者親身試驗，發現測口臭機對煙味較敏感，口臭度會達 5度。而食過香口膠的口臭度亦都達 3度，測試結果較飄忽。
售價：$580


陳山聰潮人全中

潮人陳山聰一嚟就將「吸黑頭槍」放上塊面試玩，然後突然大叫，「我知喇！一定係用嚟吸暗瘡或黑頭嘅！呢個設計嘅槍嘴向住自己吸，如無意外用喺面上。而呢支粉紅棒應該係用來測口氣！我喺雜誌見過呢部機。」


江美儀勇於嘗試

江美儀拿起「吸黑頭機」不停研究，咩都俾佢估勻：「係咪錄音機？探熱機？吹波波機呀？」到記者叫佢對住機頂呵氣後，她即恍然大悟：「哦！係測口臭機嘛！」江美儀好認真咁做測試，做完問記者：「 3度都唔算口臭啫！都算 lovely o架呵？」


諸葛梓岐靈機一觸

經常港日兩邊走嘅諸葛梓岐，起初以為測口臭機係錄音筆，玩兩玩突然靈機一觸話：「呢個係測口臭用嘅！因為我見到機上面啲 BB樣好似喊緊，應該係因為有味先會變樣。」勁有偵探頭腦！


李司棋大嗌啋

李司棋一揸起枝「吸黑頭槍」就話：「係咪電槍嚟 o架！有冇嘢出 o架？」一頭霧水嘅佢叫記者俾貼士，記者問司棋姐有冇做過 facial，佢話：「我冇做 facial o架喎！」之後佢用自己隻手試吸，「真係吸到喎！」不過最終都要記者開估。司棋姐事後大笑：「啋！我都唔用嘅！一定吸唔到我嗰啲勁暗瘡囉！」


鍾景輝創意搭夠

30後嘅 King sir鍾景輝，一見兩件小潮物，立即耍手擰頭猛話一定唔會估到。 King sir手執「測口臭機」時一度將機放近耳仔猛問：「係咪收音機嚟 o架？定係釘書機？點解畫面出現數目字？」之後佢攞起「吸黑頭器」，仲擔心氣槍會射親自己，最後 King sir都係被呢兩件小潮物考起，不過講創意度，佢肯定攞滿分。

Can we have the translation pls. thanks!!

偶像你諗住俾邊隻愛犬玩口臭機呀XD
你自己都測左喎, 係唔係靜靜雞食左gum先玩架