媽咪姐手帳
陳錦鴻、宣萱再續情緣
2010年07月09日

媽咪姐真係好唔捨得，事關晚晚追開嘅《天地豪情》，星期六（ 10日）一連播三集就大結局嘞。最後呢幾集，真係死得人多 o架！其中一個受害者就係飾演 Kelly嘅宣萱。 Kelly同陳錦鴻飾演嘅程家雄始終未能開花結果，真係好可惜。呢套劇係佢哋第一次合作，睇落好襯，所以之後如《老婆大人》等，佢哋都係一 pair。周三（ 7日），又有新劇《萬凰之王》開鏡，希望佢哋今次能有情人終成眷屬啦！


喺新劇《萬凰之王》造型記招上面，飾演全妃嘅宣萱，直頭坐咗落陳錦鴻飾演嘅道光皇帝大髀度。兩個老拍檔玩到癲晒。

陳錦鴻中年發福，宣萱睇見陳嘅肚腩同騎呢衣着，笑到收唔到口。

宣萱同陳錦鴻 1998年合作拍《天地豪情》，該劇係佢哋第一次合作。

--------------------------------------------------

電視有正嘢
福將當道《施公奇案 2》乘勝追擊
2010年07月09日

無綫搵馬浚偉及鄭則士嘅《蒲松齡》及《情越雙白線》嚟對撼有線嘅世界盃，兩人亦不負「福將」之名，馬嘅《蒲》平均收視 30％，而《情》亦有 29％，證明排陣成功。無綫為要喺「壓軸」再贏鋪勁嘅，於是繼馬同鄭之後，派另一個福將披甲上陣，邊個？咪就係師奶 fans成籮嘅 Bobby歐陽震華嘞。
Bobby係無綫嘅福將，已經係公認嘅事實，一啲都冇誇張。事關佢幾乎逢劇必收。唔講咁遠，就講 06年佢同郭可盈孭飛嘅《施公奇案》，收視一直坐穩 32％，最高仲去到 38％，成為 06年全年劇集收視之冠，都咪話唔犀利。於是無綫又摷番佢 08年拍落嘅《施 2》出嚟播，希望藉 Bobby嘅「福氣」，乘勝追擊，再下一城。

講真，《施 1》同《施 2》內容都係以「推理查案」為主，分別唔係太大。要講有分別，就係《施 1》嘅女主角係郭可盈，而《施 2》則係宣萱。雖然有傳話之所以換女主角，係因為郭 08年失落「最佳女主角」不滿而扭計。亦有說法因為宣萱之前同 Bobby合作過《賭場風雲》同《洗冤錄》，收視同口碑都好好，所以 Bobby親自「欽點」宣萱做《施 2》女主角。
點都好啦，換上宣萱都有新鮮感嘅。以記者嚟睇，宣萱戲路比較適合神神化化或大笑姑婆嘅角色。今次佢喺《施 2》入面，就係一個呃神騙鬼嘅神婆。


珠玉在前，今鋪一定要撐到行 o架！（設計對白）
你出名夠福氣，使驚？即管上!（設計對白）


吳君柔（右）因為大佬捲入咗殺人案，為救大佬，逼住投靠二叔，並且裝神弄鬼扮神婆，幫村民作法搵錢。
縣官施公同神婆吳君柔由一對冤家變成夫妻，但後來又由夫妻變番冤家。兜兜轉轉，最後都係變咗一對「歡喜冤家」。

多情施公遇蠱惑神婆

今輯嘅古仔係講乜嘅呢？話說施公（歐陽震華飾）喺經過巨變後，對官場已經意興闌珊，於是雲遊四海。中途遇到神婆吳君柔（宣萱飾）捲入一宗命案，施公本已無心查案，但因為得到枕仙牛大力（李思捷飾）幫手，最後都替吳君柔脫罪。因為咁施公嘅信心返晒嚟，繼續為民請命。與此同時，因為同吳君柔日久生情，終於娶咗君柔做姨太。
可惜施公同君柔結婚冇耐，就發覺君柔之所以同自己結婚，原來另有陰謀，卒之兩人變咗面左左。之後，佢阿媽趙月娥（李楓飾）又替佢做主，要佢娶陸小蝶（唐寧飾）為妾。誰不知呢個小蝶亦係心懷不軌。估唔到自詡英明嘅施公，俾家事同差事搞到疲於奔命，有氣冇碇唞。嗱，今次 Bobby可唔可以繼續發揮福將本色？記者認為應該十拿九穩囉。

●播映日期　 7月 12日起逢周一至周五晚 8:30pm翡翠及高清翡翠台


二姨太（姚瑩瑩）設計想施公重新振作，可惜計劃卻俾施公識穿。

溫故知新

《施公奇案》話晒隔咗幾乎 3年咁耐，點都要將內容略略講吓，觀眾可以當溫故知新，咁睇第二集時就會更加清楚。
上一集係講有閱讀障礙嘅施公，靠阿媽使錢疏通做縣官，再由阿媽喺背後做咗手腳，搵咗個蠱惑師爺幫手，得以順風順水。加上四個老婆對佢又鬼咁崇拜，搞到佢毛鬆翼鬆。直至去到第二個縣上任後，以為又係可以過度假式生活，誰不知遇上連番奇案。最後俾佢遇到枕仙，得到枕仙嘅提示得以開竅，遂以屢破懸案。
可惜最後其三姨太（郭可盈飾）及四姨太（文頌嫻飾）因一次意外海難喪生，令施公信心大失，決意離開官場，帶埋阿媽、元配及二姨太四出遊歷。

《施 2》演員當中，除飾演三姨太嘅郭可盈、四姨太嘅文頌嫻，係《施 1》最後一集遇海難死亡，仙枕盧海鵬過檔亞視外，基本演員都冇乜大變。



《施公奇案 2》


撰文：姜培綺