媽咪姐手帳
歐陽震華倉底貨救收視
2010年07月02日

《天地豪情》一擊即中，證明 TVB啲劇集新不如舊。好似八點半時段嘅劇集，簡直冇套好收，最叻嘅《蒲松齡》都只係徘徊 29、 30點，同以前動輒有三十幾點收視真係差好遠。為咗救亡，惟有向收視福將埋手。繼鄭則士後， TVB又諗到歐陽震華，不過呢個福將近兩年同 TVB冇乜合作，於是佢喺 08年拍低嘅倉底貨《施公奇案 II》就順理成章逃出生天。
06年《施》劇第一集係 Bobby配郭可盈同楊怡，當年首周收視得 28點收視，不過套劇愈煲愈旺，結局嗰集去到成 36點。今次呢輯，因郭可盈當時喺大陸拍劇，改由宣萱上陣，再加已經轉戰舞台劇嘅唐寧，卡士唔算特別強，加上觀眾啱啱先欣賞完《談情說案》嗰種超現實查案手法，依家又要睇番原始嘢，未必接受到囉！
郭可盈喺第一輯《施公奇案》飾演牙婆（即係專同政府官員做媒及招聘奴僕工人）米香蓉，收尾做咗施公第四個老婆。


《施公》第二輯，女主角就由宣萱頂上，佢喺劇入面飾演神婆。最後？咪一樣做咗歐陽震華呢個施公第六個老婆囉。

----------------

群星勁捧《天地豪情》
2010年07月02日

今年無綫冇得直播世界盃，為咗搶收視諗盡方法，除咗猛谷三線劇之外，就連深夜劇場都重播當年勁收嘅《天地豪情》，仲每晚播足兩集，等啲唔睇波嘅都可以多個選擇。《天》果然引起好多人追睇，就連圈中人都有唔少係呢個劇嘅 fans。
好似有份做嘅蔡少芬同張家輝，同埋伍詠薇、李綺雯、葉念琛都喺微博話自己有份追睇，就連有線娛樂台嘅主播都一樣倒米，話自己冇睇世界盃反而追睇《天地豪情》，證明無綫今次嘅安排真係 work嘅。
《天》劇依家進入壓軸高潮，變咗大奸鬼嘅張家輝大開殺戒，兼且死得人多。真係唔瞓覺都要追落去。